Oleh: T.A. Sakti
Leubéng
Assalamu’alaikom tanglong pisang klat
Katrok lom sahbat lon ba haluwa
Aleh cit mangat atawa luwat
Neupiyoh siat neucuba rasa!
Alhamdulillah pujoe Hadlarat
Ca-e nyang singkat lon keumeung rika
Kisah lon khusus akan latbatat
Binatang ubit nyang jinoe langka
Miseue ban Leubeng rupa mirah that
Badan jih ubit payah glip mata
Kayem aneukmiet boh “pidit” jikap
Ngon peuglah mangat boeh minyeuk peuja
Nyang leupah payah aneuk tapakat
Wab ji takot that keu minyeuk peuja
Geupayu-payu geurando geusyab
Kadang ‘oh teungeut geuluem geuraba
Minyeuk U seu-uem geutaguen siat
Bruek kreueng keu teumpat mustajab raya
Bruek kreueng ka jareueng Leubeng tan meupat
Jinoe hai sahbat bandua langka
Leubeng lam naleueng sinan meuteumpat
Hantom teurlihat ngon dua mata
Sabab that ubit haloih meu-asap
Hanasoe tupat jih rumoh tangga
‘Oh jikap aneuk baro Ma tupat
Lam lipat-lipat ‘boh pik’ aneuknda
Ngon tangke ranub geutop-top leugat
Leubeng meukeumat mirah wareuna
Geucok geupingkom geulhom lam jeurat
Palak geuh that-that deundam meumbara
“Kah Leubeng paleh kupeh ban asap
Aneuk kee kakap keumong meuh’a h’a!!!”
‘Bek duek lam naleueng hai Agam batat
Teulhon ngon bulat luweue hantom na!!!”
Meunan di Poma ka geupeu ingat
Di Sinyak Amat geureuhing saja!
Nyan kudoe jameun bacut lon sambat
Luweue jareueng that jingui aneuknda
Umu lhee-peuet thon le teulhon bulat
Luweue sok siat geuba keurija
Luweue meuseuke, peng meusaket that
Teuma lom adat cit meunan rupa
Aneukmiet jinoe pompes teubai that
Leubeng that luwat bee sy’ueng meutaga!!
PIËT
Alhamdulillah sang-sang meukeunong
Bahle ta seumong ca-e baroesa
Bak Medya Hus ulon peureunong
Neukheun beukeunong ngat leubeh gura!
Keu Piet nyang likiet kisah ta seumong
Kayem peukeumong lumpuek bruek mata
Taklok ngon gukee han keunong-keunong
Ji musom lam Ngom sibulee mata
Kadang meukarat payah pakat Ngon
Cok Piet kumarom bek reudom mata
Masak sikai breueh geuklok han keunong
Nyang na meugram-gram teubiet ie mata
Meunyo aneukmiet hana peue tanyong
Bah mata keumong han jibri raba
Jiklik bantangan payah YAH sadong
Cok Piet teungoh dom geumita cara
Geupeugotle pak rinthak deungon NGON
Badan Piet teuglong ngon kong geuhila
Piet teugeuleuntit lam abee teulhom
Geucok geupingkom sira seurapa
“Hai Piet catok broek beudok seuniwon
Peue ka keumarom bak bineh mata
Mata ka lukip bit raya keumong
Ku pingkom-pingkom hai Piet ka rasa!”
Haba pingkom Piet cit dhiet meukeunong
Buet ureueng inong get geucalitra
Ngon babah w’et-w’ot lom muka meuhoeng
Gaki geutinggrom jaroe meuputa
Sang Piet geupriek-priek geugidong-gidong
Mangat rijang kom geuple ie sira
Sabab that palak ngon Sundak geurhom:
Manok keumarom k’op-k’op dilingka
Bôh soe han palak hai Cutkak Tunong
Ji mumat that kong Piet wabaputa!
Jibalek-balek meulungkop teugom
Cutiet han keunong lipeh leupah na
Geupeunyum-peunyum Nunnyok ngen Ginong
Kayem meuteugom cit bulee mata
Peue lom ngon mata lumpuek ka keumong
Keunong han keunong gukee geuraba
Mata tan meuklep babah meungom-ngom
Nyang theun ka bingong teubiet ie mata
Bek jadeh cok Piet hai Cuda bungong
Nyang nacit beephoeng bee naf’ah gata
Piet lam geuliyueng laen lom bangon
Di dalam keumong saket lagoi na
Sang su meu ‘u’u karu meudeungong
Teubingong-bingong ureueng nyang rasa
Piet lam geuliyueng geusyot ngen runong
Awe geupotong geuplah-plah lanja
Meunyo hanjeuet nyan geutanyong-tanyong
Baroh ngen Tunong ureueng bri cara
Taple ie bakong Piet gadoh nyawong
Kheun Teungku Sarong di Ujong Rimba
‘Oh mate tasyot ngen awe gulong
Ta sinthong-sinthong thok-thok keupala
Laen lom lagee kheun Toke Sabon
Gobnyan le keubon di gampong Lala
Piet lam geuliyueng bek boeh ie bakong
Lheueh nyan hanjeuet crong rijang klo gata!
Ngon minyeuk seu-uem po Piet beukah lhong
Mate meusinthong teubiet uluwa
Geuliyueng puleh nyang reugeh tummbon
Kheun Toke Sabon peue beutoi hana(?)
Bukonle sayang kayee Jeuraloh
Sabe hana boh sampe ‘an tuha
Laju kisah Piet tanyoe meuteuoh
Panyang lon rawoh ngat samporeuna
Asai teumpat Piet uteuen lampoh soh
Trok saboh-saboh kadang angen ba
Nanjih Piet Angen ureueng meuteu-oh
Bak jak meurawoh sangkot bak ija
Bak mita pineung bak jak pot U groh
Uteuen lampoh soh kayem meudoda
Ka meusawak Piet puwoe u rumoh
Udep ji mamoh darah bak mata
Kameng Keubiri Leumo Apa Ngoh
Kayem Piet seunoh geuliyueng dada
Keubeue nyang meurot Mie-ong di rumoh
Geuliyueng peunoh bak Piet meucuca
Tuwah nasib Mie tinggai di rumoh
Kadang Apa Ngoh geutem usaha
Geutem cutiet Piet geurinthak geulhoh
Abeh Manok coh preh diyub tangga
Leumo ngen Keubeue dalam weue rumoh
Cicem meusunoh nyan Piet jimita
Cempala Ekbam dum Piet jimamoh
Seupot ngen beungoh lam weue jiteuka
Peuteubiet u Blang jak meu’ue beungoh
Watee poh siploh piyoh seunia
Keubeue jimeurot Kuek seutot mehmoh
Jidong rueng teungoh Piet jijak mita
Leumo Lem Cut Gam kambam lampoh soh
Trok dua-lhee boh po Cicempala
Ngon Tiyong batee kadang museunoh
Karat-karat coh bandum Piet pahna
Jinoe ka jareueng ureueng meuteu-oh
Aneuk Piet mamoh bak teungoh mata
Ka watee langka Piet lingka rumoh
Aleh tamah jroh aleh jeuet bala(??!!
KUMBANG
Assalamu’alaikom tanglong jeunulang
Sambong keunarang ulon peutamong
Mudah-mudahan beujeuet hiburan
Seurta peudoman agam ngon inong!!
Jinoe taputa haba keu Kumbang
‘Oh jiteureubang sujih meudeungong
Ijo meucahya sayeueb sipasang
Toe iku sikhan mirah meuganong
Kayem cong siren jipopo Kumbang
Cong limeng masam meusu ban lingong
Aneukmiet jaklet jitapih rijang
Seumpom droe Kumbang sang tanle nyawong
Japura-pura mate ka ceukang
Akai po Kumbang leupah meukeunong
‘Oh tanle ureueng muka beulakang
Laju teureubang meudeungong-deungong
Nibak cruk takue boeh beuneung pisang
Peureulee panyang sambong ngon runong
Laju jipopo dilinggang-linggang
Teukhem-khem Sigam leupah meukeunong
Beuneung bak jaroe jimatle Sigam
Dilikot Kumbang plueng-plueng sira dong
Kadang pih putoh kalheueh di Kumbang
Lagee plok beukam si Agam bingong
Di dalam uteuen le jeuneh Kumbang
Bee kh’ep dum badan ladom phet meuhong
Kumbang bak Reudeub iek jih that tajam
Muka teuh leumbam ‘oh watee keunong
Kumbang bruek Ijo cong bak Keutapang
Meuhong hanaban ulee teuh bingong
Kumbang ek Asee pih saboh garang
Luwat takalon badan jih beephong
Nyang paleng indah rindu tapandang
Kumbang bak Siron nyang su meudeungong
Jinoe ka langka leupah that sayang
Sang aleh kadang jiweh lam gunong!!!
Tambéh:
1) Kumbang banyak jenisnya. Dalam bahasa Aceh dan bahasa Indonesia, namanya sama yakni Kumbang.
Kumbang yang paling kita ingat selagi kecil adalah kumbang yang berwarna hijau bercahaya. Di bagian leher, ujung sayap berwarna coklat berbinar.
Dulu, anak-anak mengikatnya di leher dengan tali kulit batang pisang.
Ketika dilepas ia terbang dengan suara berdengung, sang anak mengejarnya di belakang sambil memegang tali pisang. Terkadang ia lepas terbang…si anak kebingungan.
Sesudah kita dewasa, ada rasa menyesal sudah membuat jera binatang ciptaan Tuhan……….!.
2) Agar nama dan nomor HP Tuan Tuan dan Puan Puan dapat muncul keatas layar, saya mohon Anda tulis sesuatu seperti: ya, ah, ih, oh, subhanallah, masya Allah dsb.
3) Pada himbauan saya yang lalu, hanya muncul 5 orang.
Padahal lebih ratusan orang masih tersebunyi akibat HP saya rusak setelah diperbaikinya.
H’UENG
Alhamdulillah lon ato kalam
Beutrok bak tanggam lagi lom teuntee
Beulam sijahtra uroe ngon malam
Syeedara rakan wareh ngon sampee
Tatamah kisah keu H’ueng nyang itam
Umpung lam lubang peuruhung kayee
Lagak bak takue kuneng meutanggam
Bak punggong ukam bisa ban sitree
Yoh masa dilee aneukmiet Agam
Drop H’ueng jipasang boeh lam Keh kayee
Cok beuneung kilang panyang ji reuntang
Halo-haloan telepon bri thee
Sang-sang Radio di kanto Medan
Peugah yum barang bak Toko Puree
Di Kota Bakti peugah u Calang
Nyang dari Sabang peugah u Saree
Watee musem nyan geumbira hanban
Aneukmiet Agam jak dum meuree-ree
Rame mita H’ueng umpung jikuran
Culok u dalam ji gege kayee
Laju H’ueng beungeh ‘et-‘et di dalam
Hai aneuk Agam peue ka peujra kee
‘Oh rayek tanyoe ka teuka sayang
Sabab binatang tulong jilakee!!
Itam lagee H’ueng saboh sinderan
Keu ureueng itam lagee ngeu kayee
TAPI ASAI LE PENG DALAM REUGAM
Beuthat beuhitam geutueng meulintee
Yoh masa awai dilee saboh jan
Bara peulangan su H’ueng meu-’ei-’ei
Meutiriep umpung ruhung disinan
Rumoh Aceh nyan tan “syarat kayee”
Meunan kheun Utoeh toe Lampoeh saban
Nan Utoeh Juhan carong “Fai kayee”
Guree Nabi Noh yoh peugot sampan
H’ueng hantroh keunan jitakot padee!!!
Tambeh:
1) H’ueng, binatang sejenis kumbang berwarna hitam bercahaya. Saat terbang bunyi sayapnya berdengung.
Biasa membuat sarang paya batang kayu yang sudah mati. Sering pula bersarang pada bingkai Tulak Angen( Tolak Angin) pada Rumoh Aceh tempo dulu.
2) Sekarang, binatang ini sudah langka.
UJO
(Kumbang pemangsa pucuk kelapa muda)
Assalamu’alaikom hukom meuteulak
Nibak ureueng jak keu awak nyang DU
Kisah keu Ujo jinoe talacak
Binatang lagak kayem bri tunu!!
Ureueng nyang jeumot keu Ujoe palak
Sabab habeh phak bandum bijeh U
Phon-phon lam seume di guyak-guyak
Trok dara ramphak mantong ji eumpu
Sabe tajaga siat hanjeuet glak
Silap sitapak mate aneuk U
Beuna ta saweue kayem tajak-jak
Trok Ujo likak tadrob taburu
Beungoh poh lapan kayem Ujo jak
Jipo jilikak lingka lampoh U
Meunyo na tanyoe tagu tanoh cak
Keunong bak utak ka mate teudu
Kadang tan tanyoe ka jadeh palak
Ujo jilantak dalam pucok U
Sinan jitoh boh jitoh ek ngen phak
Lheueh nyan ji keuprak ka jipo meupru
Hanjan sibuleuen cit katrok bak hak
Teukeupak-keupak layee pucok U
Pucok ka mate hanale ramphak
Watee ta rinthak ka putoih laju
Bak uram pucok kabeh Uek lantak
Jikap meukrak-krak sabab nyan breueh bu
Uek aneuk Ujo puteh sang pirak
Rumoh that lagak dalam pucok U
Awai takalon ta labon beuphak
Meuhan jilantak trok bak uboe U
U mantong udep rijang tatulak
Meung uboe rusak jadeh mate U
Jeuet pula laen tan guna palak
Dak tapreh ngon dak han timoh Teungku!
Ureueng nyang jeumot teuntee han glak-glak
Beu-o teukeupak sabe lam tunu!!
Meusoe boeh tangkai Ujo bek cabak
Bak U han rusak udep jih luhu
Syarat ditangkai bek that rijang glak
Ji beukaih tapak keunan talalu
Tatoh iek beungoh lam bruek geuleupak
Taple lam ramphak nyan peuleupeuek U
Lam lungkiek pucok banduwa pihak
Meungna tinggai krak uram tasibu
Ngon sabab bee sy’ueng Ujo han dijak
Mumang teukeupak jiplueng meu’u’u
Jipeugah bak ngon kee hanle kujak
Rab muntah berak kee pansan teudu
Aleh peue jiboeh Manu jen lantak
Bee that meuhayak utak teuh kra-kru
Adak deuek mate hanle kujak-jak!!
Ku peusep Bu krak atra Nek Meulu!
Laen nibak nyan tangkai ngat ramphak
Taboeh duwa krak sumpai lam siku
Jeuet on keureusong lam lungkiek tasak
Peuleupeuek kuwak sak rapat laju
‘Oh rayek bak U u ateueh jigrak
Tanyoe bek glak-glak sak rapat laju
Sira jak ple iek sumpai pih tasak
Beuthat ueh tapak bek karu-karu
Tan teupeh Ujo bak U meusigak
Rayek meugrak-grak pucok jih luhu
Meulhee thon umu laju meuri Bak
Po Ujo palak ka glak kurek U
Baro watee nyan ureueng Po cangklak
Jeuet keuprak-keuprak preh ji meuboh U
Bah that pih mantong kadang Ujo tak
Paleng le sibak kheundak Tuhanku
Masa Beulanda na haba sikrak
Kisah nyan nibak Ponek Rot Timu
Jameun ‘oh geukoh bak U ngon gampak
Uram payah sak tatanom laju
Meunan peurintah atoran bijak
Hanjeuet tatulak beuthat beutunu
Meunghan ji deunda “siringget pirak”
Hansep limong bak tapeubloe bak U
Meunyo uram U teudu meubak-bak
Ujo that galak keunan jituju
Jak pajoh umpeuen hidang lam tabak
Jitoh boh meukrak ‘oh ceh meutabu
Tangkai sipeue treuk buet ureueng bijak
Supaya jarak Ujo nibak U
Lam lampoh teubee bijeh U tasak
Ujo hanjeuet jak teusie-sie iku
Jipo-po jeuoh jilikak-likak
Jipandang ubak teubee lampoh U
Jikheun bak rakan bek jadeh tajak
Lheueh jipeutapak jiwehle meubru
Hikayat Ujo panyang that hai Kak
Lon harap bek glak neubaca laju
Buhu tatuka ngat leubeh ramphak
Bak ujong sanjak bekle ak ngen u
Di Rumoh Teungoh le ureueng patah**
Mukim gob peugah nan Bungong Taloe
Badan po Ujo itam sileupah
Rueng takue mirah gagah seureuloe
Sikrak beurale hi lagee gajah
Aleh cit babah euntah hidong droe
Jipo meudeungong suara indah
Taturi bagah nyankeuh su Ujo
Aneukmiet dilee jan bak U geuplah
Meureupah-reupah jak eu tiep uroe
Ladom jak beungoh ban uroe beukah
Ladom jisinggah Sikula jiwoe
Jibalek gue U on jipeusiblah
Jiploh beureukah bak tamon baroe
Jimita Ujo galak sileupah
Saboh meuribaih jipeucrok ngen troe
Payah meuteumeung Ujo plueng lincah
Teureubang bagah gohlom tapeutoe
Meujan-jan jidrop soe tapih bagah
Lheueh meutak galah bak tapih Ujo
Ujo jiikat Sinyak Beuransah
Bak cruek takue sah ka jiboeh taloe
Jipeupo-peupo meudeungong indah
Lheueh nyan jikeubah lam eumpang ragoe
Keu Patok rukok peuget si ulah
Beurale gajah jikoh bak Ujo
Jipiep rot ujong bakong rot beukah
Rupa sa leupah Patok nyang tabloe
Jinoe taingat cit sangat teulah
Binatang taplah deumi seunang droe
Piasan yoh ubit na rasa salah
Mudahan Allah ampon geutanyoe!!
Taingat Ujo le tinggai kisah
Ladom meudarah wab meukhok bak dhoe
Bak tiyeueb Ujo toe paya Pojah
Trieng rancong siblah teugeng sinan toe
Jinoe ka langka Ujo ban gajah
Sang kadit leupah dalam ‘alam nyoe
Bak saboh pihak Alhamdulillah!!
Cuco Nek Beusah tan turi Ujo(??)
Tambeh:
1) Ujo, sejenis kumbang, saat terbang suara sayapnya berdengung.
2. Di bagian kepala ada semacam belalai, dan badannya pun mirip gajah. Belalai itu dicopot anak-anak dijadikan pipa rokok.
Begitulah, dunia anak-anak masa dulu ‘bergembira” atas penderitaan makhluk Tuhan.
3. Anak-anak sering menangkapnya sebagai permainan. Diikat di leher dengan benang batang pisang, ketika ia terbang anak-anak berlarian di belakang.
4. Kini binatang Ujo sudah langka. Tentu bukan gara-gara ditangkap anak-anak tempo dulu.
**. Rumoh Teungoh, tempat saya berobat patah kaki (April 1986 – April 1987), berada di Gampong Ujong Blang, Mukim Bungong Taloe, kecamatan Beutong, kabupaten Nagan Raya ( dulu kabupaten Aceh Barat), provinsi Aceh.
Kaki kanan saya patah akibat musibah di Jalan Raya, saat pulang ke kampus dari tugas KKN-UGM pada hari terakhir.
Tugas KKN saya di desa Guli, kecamatan Nogosari, kabupaten Boyolali, Jawa Tengah.
( T.A. Sakti )
SIDOM BAÉT
Assalamu’alaikom saleuem lon peu-et
Disyeb u Mugreb trok lungkiek gunong
Ca-e Bak Jambo apui beu-udep
Meungkayee hansep bah tatot runong
Paleng meut’iet-t’iet jikap lam Baet
Umpung jililet lingka bak bungong
Cit payah syen-syen bak peutheun saket
Geupiret -piret mangat bek keumong
Pat nyang sidom kab tagaro beutreb
Bisa lam Baet hanapepe tanyong
Citna peupatah ‘et saboh bayet :
“Sidom Baet sipat jikab lhee pat saket”
Ladom aneukmiet beureughek sulet
Jihoi Si Wahed teungoh cok reunong
Ji peugah Cicak teungoh meulet-let
Ladom Bonbon phet pura jok keu Ngon
Rakan ka dijak jidong meu-apet
Umpung lam Baet sinan meutamon
Gaki ka jikab laju jicupet
Di Agam sulet jiplueng u Tunong
Pat saja mantong jiduek lam Baet
Umpung ban buket meuseumong-seumong
Peuelom musem khueng ujeuen tan siblet
Umpung lam Baet dileuen ban gunong
Umpung jih panyang meuliwet-liwet
Lagee Seunapet Seulawah Inong
Jan-jan jireuloh uleh Si Mayed
Hana padum treb lom-lom jiseumong
‘Oh musem ujeuen dileuen meulep-lep
Sayang lam Baet dum habeh bingong
Payah meungungsi mita Cot -Buket
Barang meutrep-trep rayueng deungon Ngon
Umpeuen deungon boh jime u buket
Nyang saket syiret reumatik keumong
Cit lam seutia seunang deungon phet
Meunan lam Baet akai that keunong
Diyub Moh jidom dum sidom Baet
Mirah ban Pijet yub rumoh inong
Meung Rumoh Aceh hanthat meupiret
Sayang leupah phet “Rumoh Beulangong”
Rumoh bak tanoh kajeuet peunyaket
Meunyo lam Baet sinan meunawong
Peuelom ‘oh jikab that saket-saket
Garo beutreb-treb babah meungom-ngom!!
Na aneuk manyak umu goh lawet
Meuliwet-liwet jak baroh-tunong
Jiklik siat-at buet sidom ceupet
Leumbam meutiriep bak badan keumong
Kap saboh-saboh palak hana trep
Nyang leupah saket jikap meutamon
Peuelom di Cuda laloe meupetpet
Soe publa pih treb dang trok Nek Tunong
Jiklik kaseb gleuen di leuen Pang Mayed
Hoi Tabib Taleb bisa geujak H’ong
Lagee boh bajek keureutuet kulet
Keu suai saket hanapeue tanyong
Ka geutot suwa Ayahwa Mayed
Geulhiet peulilet pat-pat na Sidom
Habeh keurikeb tutong lam Baet
Sidumnan saket hate ceumeungom
Na cara laen use lam Baet
Hana that saket tan gadoh nyawong
Ngon bubok kupi tabu talilet
Pat jiduek Baet umpung meutamon
Deungon “seumaloe” bee bubok nyang phet
Jiweh lam Baet hanjan seun limong
Sampe dua thon sidumnan lawet
Trok lom lam Baet ‘oh gadoh meuhong
Meungka teuka lom bek sagai peutreb
Tabu bubok phet beuleubeh keunong
Meunyo watee phon seb deungon lhee blet
Jinoe bek peuseb meunggoh trok limong
Jiweh lom Sidom habeh kom phet-phet
Meuthon-thon lawet hanle jitamong
Rumoh ka sihat tanle peunyaket
Dak tameurateb khusy’uk lam nyawong
Serambi Indonesia dilee di Baet
Haba gob peu-et baroh ngon tunong
Peuekeuh gampong nyan asai LAM BAET
Sidom that saket kab ureueng keumong(???)
Tambeh:
– Sidom = semut
– Baet = jenis semut merah yang sedang badannya.
1) Sidom baet, biasanya membuat sarang di pinggiran rumah dan gedung atau di kaki tiang Rumoh Aceh tempo dulu.
2) Saat musim kemarau, di halaman rumah pun dibuat sarang. Bentuknya berderet panjang bagikan gugusan gunung Bukit Barisan.
3) Bila kumbang Ujo, kejahatannya memakan bibit tanaman kelapa (bijeh U), maka Sidom Baet menyakitkan tubuh kita karena gigitannya. Semut ini terkesan sadis dan buas, cepat sekali menggigit terhadap apa pun yang mengganggunya.
4) Mulutnya amat berbisa, dan kalau banyak semut yang mengeroyok kita, bisa menimbulkan demam panas. Apalagi yang digigitnya anak kecil.
( T.A. Sakti )
MEUK
Alhamdulillah kisah ka paneuk
Hanle meu-iseuk sang hek ka mumang
Lon lakee meu’ah haba meusireuk
Panyang ngon paneuk kadang tan timang
Kisah binatang kadang meusiseuek
Kabeh lon supreuek dalam karangan
Haba tan meupeue roh lon peubeuheuek
Cit hantom gob weuek reunteh lageei nyan
Karoh teulanjo tuto meusireuek
Nibak lon duek-duek peulale tangan
Ulon saket pha tan meuho iseuk
Bek meugeurasuek kaco pikeran
Ulon tulehle peue-peue meubayeuek
Mulai Cakeuek trok Cicem Subang
Jinoe keu neulheueh lon kisah keu MEUK
Dang-dang meuseupreuek laen pikeran!!
Ca-e Bak Jambo tabantu bek deuek
Bek sampe euntreuek habeh karangan
Wahe rakan lon boudoih bekle duek
Kirem bek ceuek-ceuek laju karangan
Keu ACEHTV sinan na neuleuek
‘Oh masak intreuk mangat hanaban
Buet Medya Hus nyang puta aweuek
Bah neukirem bruek ek jeuet keu intan
Carong bak pileh geupeugleh siseuek
Lagak sang sineuek intan-beurlian
Meu’ah deesya lon pat-pat na meupeuek
Jinoe lom keu MEUK ulon peuriwang
Dilee ‘oh malam le that jipo Meuk
Watee ta jingeuk nyan Kunang-kunang
’Oh watee jipo cahya meusipreuek
Aneukmiet let Meuk hate that seunang
‘Ohka jiteumeile Sinyak Riweuek
Ka jipasoe Meuk dalam peuluman
Lheueh nyan jihudom meujingeuk-jingeuk
Cahya punggong Meuk hate teurtawan
Nyang ladom pasoe lam kaca minyeuk
Ji sumpai euntreuk deungon on pisang
Lam kaca ta eu blet-blot cahya Meuk
Jan-jan meusireuk bak ek u manyang
Meung na dua-lhee ka jipasoe Meuk
Blet-blot meusipreuk sang Kuta Midan
Aneukmiet seunang rayueng-rayueng Meuk
Sampe ‘an teungeut ka jula malam
‘Oh watee uroe tan cahya po Meuk
Jih meugeurasuek luwat ta pandang
‘Oh watee malam siat bek taseuk
Dumnan lagak Meuk beusabe sajan
Nibak punggong Meuk cahya meusipreuek
Meunan peuneuduek ciptaan Tuhan
Saboh cairan hitam meuneuk-neuk
Watee jipo Meuk lagee ek bintang
Punggong meumet-met meu-iseuk-iseuk
‘Oh malam euntreuk cahya jih bandrang
Lam seupot culok meung le jipo Meuk
Sang sinte peuet neuk ubat di dalam
Lam kulam tuha le bak crot-eumpeuk
Sinan le that Meuk ‘oh watee malam
‘Oh lheueh troe umpeuen jipo meusipreuek
Kadang ta eu Meuk sang toe ngen bintang
Nyang po leuen rumoh kadum nan beuheuek
Karoh lam aweuek Sinyak Dorraman
Pasoe lam kaca atawa lam bruek
Ji peulheueh euntreuk meung umu panyang
Jameun tan WC toeh ek lam abeuek
Jan geukalon Meuk geusangka syaitan
Geuplueng cot gateh dum ek meupeuek-peuek
Trok gampong geuduek : toeh tinggai sikhan
Pakon geutakot Lem Lambot Riweuek
Kareuna di Meuk jipo tan manyang
Geusangka Rimueng nyang ban meu-aneuk
Kayem di jingeuk toe umong Cot Drang
Atawa Burong Punjot meuseukk-seuek
Nibak ureueng ceuek cit le that waham
Jeh di Meuk keudroe mita Bu beuheuek
Sayang ureueng ceuek habeh meuligan
Bak seuram-seuram meung na jipo Meuk
Ureueng nyang gusuen macam pikeran
Miseue bak uteuen jen seumbo aneuk
Kheun Utoh Paneuk sinan bee bawang
Meunyo disinan kayem jipo Meuk
Tanda po aneuk saket bangkaran
Geutanyoe insan bek keunan taseuek
Meusabab euntreuk jih’ongle rijang
Gob tengoh saket tanyoe peukak-kuek
Ji teumeung giduek pansan disinan
Meunan geupeugah Apa Man Riweuek
Digobnyan that ceuek nyang meunan-meunan!!
Kontributor : T.A. Sakti
Editor : ADM Acheh Network
SHARE :
