Oleh: T.A. Sakti
Bismillahirrahmanirrahim kalam tamula
Nibak Rabbana rahmat talakee
Beutrang pikiran ilham beuteuka
Kamoe calitra budaya layee
Budaya Aceh rab layee rata
Duson ngon kuta ka habeh padee
Hansoe paduli tan soe boh bajaa
Di sinan punca budaya layee
Tanyoe ka abeh dok budaya luwa
Trok dalam kamba dum filem lahee
Hanale soe tham tanle soe sangga
Ulama-Umara meuteukui ulee
Ka talo mandang seumangat goga
Mumang keunira talo eleumee
Sabab that canggih digob seunjata
U dalam kamba jilop meuree-ree
Jinoe meunyo na Micut dan Apa
Sya-e geubaca di jambo madee
Ureueng keumade cuco dikata
Sideukah sigra dijok peumalee
Diunyet meunan Keumuen keu Yahwa
Masa keu masa bit teuka malee
Ka meunang Kumuen katalo Apa
Takot dikata ban ureueng seudee
Nasib sastra Aceh meunan keuh rupa
Hikayat phon sa Nazam Tambeh lhee
Di bahsa Aceh tan jeuoh bida
Dalam sikula tan soe peudatee
Hansoe tem turot ban Bali- Jawa
Bahsa ngon sastra got jipeulagee
“Muatan lokal” geurasi nama
Dalam sikula that geuperureulee
Duwa ploh persen kurikulum beuna
Cit yue Negara padum thon dilee
Di daerah gob ka maju rata
Di Aceh saja sang malee-malee
Sabab tan sunggoh lam pura-pura
Nyan keuh budaya dum habeh layee
Bek lagee Got-Got tanyoe syeedara
Nyang tan tamita nyang na taseubee
Kontributor : T.A. Sakti
Editor : ADM
SHARE :
