Oleh: T. A. Sakti
Assalamualaikum Kawon Iseulam
Inong ngon agam aduen ngon adek
Saleum sijahtera bangsa droe taulan
Dua blah tangan jaroe lon tabek
Alhamdulillah syuko keu Tuhan
Nyang peujeuet ‘Alam itam ngon burek
Allah Ta’ala kuasa hanban
Nyata bak alam konka tatilek
Lheueh nyan seulaweuet keu Muhammadan
Rasul pilihan nyang leubeh tarek
Nabi nyang leubeh ban sigom alam
Tanyoe Islam ureueng pomilek
Meuseb keuh ohnoe peumbuka kalam
Jinoe tujuan laju tatilek
Masa katalo Nippon biek Jeupang
Nyang mat pimpinan bangsa droe adek
Soekarno-Hatta dua ureueng nyan
Nyang mat pimpinan nanggroe Reupublek
Umum merdeka keu seuluroh ‘Alam
Keu biek jahannam hanpeue le tabek
Kaphe Beulanda Heiho biek Jeupang
Hanpeue kheun tuan tanyoe hai adek
Masa dileekon pane na meunan
Beulanda Ceupang haroh tatabek
Meunan keuh bagoe naggroe jajahan
Gob mat pimpinan nyang tulak tarek
Ban dipeurintah le kaphe suwang
Geutanyoe rakan hanjeut taasek
Ureueng dewasa bandum keunong Wang
Beulasteng geupeunan wahe E Nyak Dek
Soe han-ek bayeue paloe kon wayang
Kadang hai rakan umong jitarek
Keurija Rudi (rodi) upah jibri tan
Geutanyoe rakan uteuen yue reulek
Diyue sek naleueng ngon peugot jalan
Masanyan taulan han soe jeuet asek
Ureueng nyang salah bagah dikeukang
Laju lam sampan rijang dipeu-ek
Diboih u Beutawi Cilacap Irian
Nyang ladom sayang tan teumeung balek
Tinggai ngon aneuk inong ngon agam
Meulintee tuan aduen ngon adek
Tinggai peurumoh gampong halaman
Tinggai lampoh blang paya ngon tasek
Muenan keuh bagoe nanggroe masanyan
Ureueng Nederland akai that burek
Yoh masa Nippon pih saboh macam
Bacut lon karang sinoe hai adek
Haba jitabu sidadu Ceupang
Kamoe hai rakan seutia bayek
Asia timur-raya bersatu rijang
Untuk puga prang let kaphe burek
Ureueng geutanyoe peucaya rijang
Bandum mat cekyang kaphe geureulek
‘Oh talo kaphe han le jiriwang
Pulitek Jeupang laju mubalek
Laju peugot Pos jaga rata jeueb simpang
Peugot beurandang duson ngon tasek
Pade lam gampong meugunca kuyan
Mandum keu ceupang haroih tapeu-ek
Ureueng B.D.K peusapat rijang
Diyue le Jeupang pade jitarek
Ureueng lam gampong habeh soh eumpang
Keu breueh bu Ceupang lam prang Pasifek
Peurangoe Jepun gothat kreueh ceukang
Ureueng jireupang nyang meupolitek
Jipasoe lamtong lam laot jilham
Bandum jibuang meunyo ceureudek
Ureueng lam naggroe le nyawong hilang
Nyang leupah sayang puga Blang Putek
Diyue peugot Tren kapai teureubang
Uteuen diyue cang urot bak rubek
Masa watee jak dum garang-garang
Watee geuriwang bandum pruet tarek
Nyang ladom teuma nyang leupah sayang
Tan teumeung riwang kunoe u bilek
Rakyat lam gampong meung ija pihtan
Habeh jisimpanle Jeupang burek
Han ek na bajee ngon ija pinggang
Ta eu bak badan gutee dum ji-ek
Ngon kude buta rata bak badan
Sabab ija tan seb nyamok culek
Pijet ngon gutee jipangkee rijang
Ureueng masanyan dum burek-burek
Saka lam nanggroe soe rasa pihtan
Gula meulisan bek tanyong adek
Bandum barang nyan keuneubah Jeupang
Keubah keubahan lam Prang Pasifek
Bak U bak pineung dum diyue pancang
Diyue glong lam blang kuta ngon tasek
Nabek jeuet jitron kapai teureubang
Musoh nyang datang ngat payah ji-ek
Meunan keuh bacut kisah bhah Ceupang
Susah kon wayang masanyan adek
Sang hanle talo si kaphe suwang
Payah gob lawan jih gotthat tarek
Takdirullah keuheundak Tuhan
Di bangsa Ceupang ka gadoh tarek
Buet Amerika dua bom dilham
Katalo Jeupang payah bot tabek
Di nanggroe tanyoe Ceupang ka guncang
Bandum diriwang lam kapai ji-ek
Kahabeh jiwoe u nanggroe Japan
Ladom keunong cang mate lam parek
Tanyoe Merdeka Indonesia geubohnan
Mulai Sabang sampae u murek (Merauke)
Geubeuntuk laju pemerintahan
Kon keurajaan tapi reupublek
Republik Indonesia ceudah geupeunan
Kalheueh sarengan pilihan bayek
Nanggroe merdeka konle jajahan
Nyang mat pimpinan biek droeteuh adek
Nanggroe merdeka geupeuna parlemen
Ngon undang-undang dasar thon ‘45
Dasar negara Pancasila nan
Deungon Presiden Wakil lom teuma
Di Jakarta pusat geuduek pimpinan
Yoh phon masanyan Soekarno-Hatta
Tiep-tiep daerah geubri pimpinan
Di Aceh teuman di Koetaraja
(Banda Aceh sekarang)
Bale Tambeh: Seulanyan, 21 Oktober 2024, poh 05.00 WIB.
(T.A. Sakti)
Kontributor : T.A. Sakti
Editor : ADM
SHARE :
