Ulèëbalang phôn nyang paréntah di Keulèëbalangan Keureutoë nakeuh Teuku Keujruën Peugamat dan nyan keuseuneulheuëh hingga Indônesia madéka nakeuh Teuku Raja Sabi.
Tapi na sidroë ulèëbalang nyang jithèë nibak nanggroë nyan nakeuh Cut Nyak Asiah.
Gobnyan geunantoë lakoëgeuh nyan nan lakoë gobnyan nakeuh Teuku Chik Muhammad Ali ‘oh lheuëh lakoëgeuh nyan meuninggai.
Cut Nyak Asiah nakeuh sidroë ureuëng inöng nyang beuhê ngön gigèh dan caröng bak geumeututô lam majeulih.
Meukawén antara Cut Nyak Asiah deungön Teuku Chik Muhammad Ali lahé duwa droë aneuk, teutapi ban duwa aneuk nyan ka meuninggai yôh watèë ubeut.
Meunurôt adat sidroë ulèëbalang nyang meuninggai suwah geugantoë lé turônangeuh.
Meusabab nyan keuh Cut Nyak Asiah geucok duwa droë aneuk agam T Bén Beureughang nyang nan Teuku Syamsarif ngön Teuku Cut Muhammad seubagoë aneukgeuh.
‘Oh lheuëh Cut Nyak Asiah meuninggai Olanda nyang ka hasé jiduëk di Keureutoë jicuba peukacho peuliték keureutoë jineuk peupok sabé-sabé bansawan keureutoë.
Olanda jiangkèë Teuku Syamsarif, nyang hana jigalak lé rakyat sabab meurakan atawa keureuja-sama deungön Olanda, seubagoë uleebalang.
Teuku Cut Muhammad han geuteurimöng buët keurijasama nyan.
Lheuëh nyan, gobnyan geupimpén rakyatgeuh geulawan Olanda dan geumeujuwang lam glé sajan rakyatgeuh.
Lam masa prang-muprang ngön Olanda, Teuku Chik Muhammad meugabông deungön pasukanTeuku Bén Dawôd.
Seugohlom nyan Teuku Cut Muhammad geumuprang sajan ngön Seulôtan bak watèë Seulôtan ngön Panglima Polém geupeujeuët Pasè ngön Acèh Utara seubagoë pusat peutahanan.
Ateuëh jasa-jasa gobnyan, sampé Teuku Cut Muhammad geuangkèë seubagoë ulèëbalang Keureuto nibak seulôtan deungön siôn surat peuangkèë nyang geungui ngön cap sikureuëng.
Uléh keureuna nyan, nanggroë keureuto jeuët keu duwa droë ulèëbalang, yakni Teuku Syamsarif nyang diangkèë lé Olanda seubagoë ulèëbalang Barôh (nyang geupeuturi deungön nan Teuku Chik Di Barôh atawa Teuku Chik Béntara) an Teuku Cut Muhammad nyang geuangkèë lé seulôtan seubagoë ulèëbalang Tunong nyang dudoë lheuëh nyan geulakab Teuku Chik Di Tunong.
Teuku Chik Di Tunong gobnyan kön nyang pungo keu pangkat jabatan, bibeuëh nibak peungarôh aséng. Gobnyan beutôi-butôi han geutém tundôk keu peungarôh aséng nyang kayém jihina bansa ngön agama.
Sifeuët nyan sabé na sajan sampé jeuët keu ulèëbalang.
Teuku Chik Di Tunong bukön cuma sikada ulèëbalang nyang han geutém meukeureujasama ngön Olanda, teutapi gobnyan pih sidroë ulèë imum muslimin nyang jitakôt lé lawan ngön geuhoreumat lam kawan.
Lheuëh geumeukawén ngön Cut Nyak Meutiya, Teuku Chik Di Tunong leubèh seumangat lam meujuwang geulawan Olanda sabab peujuwangangeuh geudukông lé peureumohgeuh.
Jeuët keuh ureuëng nyan ban duwa peusangan nyang sikufô nyang saléng siiréng langkah lam peujuawangan geuprang Olanda.
Baih peujuwangan Teuku Chik Tunong, Zentgraaff (1982: 148), na tom jimeuceuköt ngön naritjih
“sungguh sebuah kisah tersendiri. Mendadak, bagaikan kilat, ia melakukan serangan-serangan, sebentar di sini kemudian beralih di sana, dan menghilang jauh-jauh. Dia cukup arif memahami, agar tidak selalu melakukan perlawanan-perlawanan yang teratur terhadap pasukan Belanda”.
Bak watèë geumuprang Teuku Chik Tunong geungui cara nyang hayeuë ngön matang. Seugohlom geutheun patroli Olanda ka awai phôn dilèë geu atô aseuka meuluëm.
Deungön na lagèë nyan, ureuëng nyan jeuët geupeusiëp aseukageuh.
Deungön cara nyan keuh seudadu Olanda geutheun dan geupoh hingga Teuku Chik Tunong ngön aseukageuh geuteumeung cok sinyata seudadu Olanda.
 |
| Jeurat Teuku Chik Ditunong (Teuku Cut Muhammad) ngön Jeurat Teuku Dibuwah (Teuku Muhammad Dawôd) |
Na meupadup-padup gö geuteumeung theun patroli Olanda. Bak thôn 1902 aseuka Teuku Chik Tunong geukeupông Detasemen Infantri nyang jipimpén lé kumandan Van Steijn Parve nyang na 30 droë seudadu.
Teuku Chik Tunong geutuho ra’uëh nyang jilèwat lé seudadu Olanda, lheuëh nyan geuprang laju nibak jalan nyan hana ji’ôh nibak Meunasah Jeuroë.
Na saboh calitra nyang that hayeuë dan sampé rhêt seumangat seudadu Olanda nakeuh keujadian bak buleuën November 1903.
Bak watèë nyan, saboh pasukan patroli nyang jipimpén lé Letnan Kok ji’ék duwa boh jalô dari Kruëng Sampoë Niët (Sampoiniët) jijak u gampông Matang Reyeuk.
Pasukan nyan jineuk peuhancô aseuka Teuku Chik Tunong nyang keuneuk peugöt khanduri raya.
Padahai khanduri nyan hana,cuma akai akai Teuku Chik Tunong nyang geutipèë pasukan Olanda.
Lagèë Rancana, lam kruëng nyan meuhasé geupoh seudadu Olanda nyang jipimpén lé lètnan Kok nyan.***
Editor : ADM Acheh Network
SHARE :
